СҚО экономикасына 5 айдың ішінде 43,8 млрд теңге инвестиция тартылды
3 Шілде, 2017 20:36
Солтүстік Қазақстан облысының экономикасына соңғы 5 айда 43,8 млрд теңге инвестиция тартылды, 2016 жылдың сәйкесінше кезеңімен салыстырғанда өсім 21,2% құрады. Бұл туралы «Ұлт жоспары – 100 нақты қадам» бес институционалды реформаны жүзеге асыру аясында атқарылған жұмыстар туралы аппарат отырысында облыстық экономика басқармасының бастығы Арсен Қазбеков хабарлады.
Оның айтуынша, мемлекеттік атқарушы органдарға индустрияландыру мен экономикалық өсіммен байланысты үшінші бағыт бойынша қадамдар бекітілген.
СҚО әкімдігі хабарлағандай, баяндаманы тыңдаған облыс әкімі Құмар Ақсақалов стратегиялық құжатты жүзеге асыру бойынша жұмыстарды күшейтуді тапсырды.
«Реформалар бірінші кезекте халықтың өмір сүру сапасын арттыруға бағытталған. Әр қадамның артында қыруар шаруа бар, яғни сәйкесінше заңдар қабылданды, жаңа қарым-қатынас орнатылды, бүтін бір бағдарлама қабылданды және қаржы да бөлінуде. Бұл реформалардан кейін адамдар өмір сүру жағдайы жақсарғанын сезінуі тиіс. Біздің қызметіміз өз нәтижесін беруі тиіс», - деп атап өтті облыс әкімі.
