Астанада робототехника бойынша жарыс өтуде

3 Шілде, 2017 12:13

Елордада World Robot Olymiad тақырыбымен робототехника бойынша жарыс басталды. Олимпиада негізгі, шығармашылық, роботтар футболы мен студенттік санаттарына жататын LEGO-роботтар жарысы болып табылады, деп хабарлады Астана қаласының әкімдігі.

Жарысқа еліміздің барлық өңірлерінен 150 команда қатысуда. Чемпионатқа 300-ге жуық қатысушы келді. Ең үлкен делегация Алматыдан келген. Павлодардан келген ең жас қатысушы 8 жаста. Сондай-ақ биыл жарысқа Өзбекстан да қатысуда.

«Қазақстандағы робототехника болашақта дами түседі деп ойлаймын. Себебі адамдар үлкен қызығушылық танытуда және елімізде өте жақсы жаттықтырушылар құрамы даярланған. Робототехника бойынша жарыстар өңірлерде де өткізіле бастады», – деп атап өтті "Назарбаев Зияткерлік мектептері" ДБҰ басқарма төрағасы Күләш Шамшидинова.

Ұлттық сайыстар мен оқу-жаттығу жиындарының қорытындылары бойынша Қазақстанның ұлттық құрама командасы құрылып, 2017 жылғы қарашада Коста-Рикада Қазақстанның абыройын қорғамақ.

Чемпионат НЗМ базасында осымен үшінші жыл қатарынан өтіп жатыр, биылғы тақырып - "Тұрақты даму".

Еске сала кетейік, 2014 жылы "Назарбаев Зияткерлік мектептері" ДБҰ WRO ережелері бойынша Қазақстанның робототехника бойынша ұлттық үйлестірушісі мәртебесіне ие болған.

Барлық жаңалықтар