Жамбыл облысының Сарысу ауданында 5 тұрғын үй салынған

Жаңатас қаласында бүгінгі таңда 84 көпқабатты тұрғын үй және 41 екі қабатты коттедж, барлығы 5476 пәтер бар. Ауданда жалпы алаңы 567 шаршы метрді құрайтын 5 жеке тұрғын үй пайдалануға берілді.

Жаңатас қаласындағы 1-ші шағын ауданындағы 120 пәтерлік №34 көп қабатты тұрғын үйді қайта қалпына келтіру бойынша жұмыстар жүргізілуде. Мұндай тың ақпаратты Өңірлік коммуникациялар қызметінде өткен брифингте Сарысу ауданы әкімінің орынбасары Көкей Олжас Тұрғынұлы айтты.

Тұрғындарды сапалы ауыз сумен қамтамасыз ету  халықтың денсаулығын жақсартудың маңызды бір бөлігі. Сондықтан, бұл сала әрқашан басымдыққа ие.

«Ауыз су» және «Ақбұлақ» бағдарламаларын жүзеге асыру мақсатында 26 елді мекеннің бүгінгі таңда 12-сінде жер асты су қоры зерттеліп, қорытындысы алынды.

Жаңатас қаласында бірнеше жылдан бері «Жаңатас қаласының су құбыры желілерінің І және ІІ кезең құрылыстарының» және «Кәріз желілерін жаңғырту жұмыстары» жүргізілуде.

«Жаңатас қаласының су құбыры желілерінің құрылыстары үстіміздегі жылдың қазан айында аяқталып, қала халқына су тәулік бойына берілетін болады.

Игілік, Өндіріс ауылдарының ауыз су жүйелерін қалпына келтіру жұмыстарының жобалық сметалық құжаттары түзетіліп, мемлекеттік сараптамаға ұсынылды.

Ұ.Сыздықбайұлы және Арыстанды ауылдарының үй маңындағы жерлерін суару үшін су реттегіш тоғандар салуға (23,2 млн.тг) және Тоғызкент ауылындағы «Жарма» бөгетінің құрылысына (94,6 млн.тг) 2017 жылы облыстық бюджеттен 117,8 млн. теңге қаражат бөлінген.