Қазақстанда 2016 жылы 11,1 млн скрининг жасалды – Денсаулық министрлігі (ФОТО)

22 Маусым, 2017 16:21

2016 жылы республикада мақсатты топтарға 11,1 млн скрининг-зерттеу жүргізіліп, 250 мыңға жуық дерт жағдайы тіркелді. Бұл туралы Денсаулық сақтау министрі Елжан Біртанов халықпен есептік кездесуінде айтты.

Министр айтып өткендей, дертті алдын ала анықтау мақсатында 2008 жылдан бастап Ұлттық скринингтік бағдарлама жүзеге асырылуда.

«Мақсатты топтар арасында скринингтің 11 түрі жүргізілді, оның ішінде онкологиялық аурулар, қант диабетіне қарсы, артерия гипертензия мен өзге дерт түрлері бар. 2016 жылы республикада 6,5 млн адам қамтылды, ол жоспардың 100 пайыздық көрсеткішін құрайды. 11,1 млн скрининг-зерттеу өткізіліп, 250 мың ауруға шалдығу жағдайы анықталды. Науқастар диспансерлік тіркеуге тұрып, сауықтыруға бағытталды», - деді ведомство басшысы.

Біртанов айтып өткендей, скринингтер дертті ерте табуға бағытталғанына қарамастан, халықтың қызығушылығы төмен екені байқалып отыр.

«Аталмыш өңірлерде скрининг 100 пайызға жүргізілді деген көрсеткіш күмән туғызады. Сондықтан да тиімді шараны қамтамасыз етудің басты талабы қоғам тарапынан бақылау жүргізу болып табылады», - деді министр.

Айта кетейік, есептік кездесу барысында Елжан Біртанов Қоғамдық денсаулық сақтау қызметінің жұмысы туралы айтып өтті.

Ақбота Күзекбай