Сандық телевизияның негізгі топтамасы халық үшін тегін болады – Д.Абаев
21 Маусым, 2017 13:49
Қазақстан 2019 жылы сандық телевизияға көшеді. Сандық телевизияның артықшылығы туралы Ақпарат және коммуникация министрі Дәурен Абаев халықпен есептік кездесуі барысында айтты.
«Меніңше, 2019 жылдан бастап біз теория жүзінде сандық телевизияға көше аламыз. Сандық таратылым тегін болады. Мәселе басқада болып отыр. Кез келген теледидар сандық таратылымға қосыла алмайды», - деді министр.
Сондай-ақ, Д.Абаев айтып өткендей, халықтың әлеуметтік аз қамтылған бөлігі үшін жергілікті атқарушы органдар қосымша алады. Ол қосымшалар тікелей теледидарға орнатылады.
«Сапасыз көрсететін 3-4 арнаның орнына, көрермен 15-30 жоғары сапалы арнаны көретін болады. Бұл БАҚ-тың дамуына да ынталандыру болмақ», - деді ведомство басшысы.
Д.Абаев айтып өткендей, сандық телевизияның негізгі топтамасы тегін болады.
Айта кетейік, бүгін Дәурен Абаев халық алдында есептік кездесу өткізді.
Ақбота Күзекбай
