ЭКСПО-2017 көрмесіне келушілер саны белгілі болды

19 Маусым, 2017 20:33

Астанадағы ЭКСПО-2017 көрмесінде 1 млн-нан астам адам болды. Бұл туралы ЭКСПО-2017 көрмесінің басқарушы директоры Бейбіт Қарымсақов ЭКСПО медиа-орталығында өткен баспасөз конференциясында хабарлады.

«Өткен апта ішінде біздің павильонымызда 205561 адам болды. Келушілердің жиынтық саны 1 млн 57 мың 218 адамды құрады. Келушілердің негізгі объектілер бойынша саны 167 мың 884 адамды құрайды. Соның ішінде «Нұр-Әлем» басты павильонын 86,5 мың адам көрген. Осы уақыт ішінде біздің объектілерімізде 26 мыңнан астам шетелдік келуші болған, бұл 13 пайызға жуық. Бір адам, орта есеппен, 5-6 объектіні көріп үлгереді. Көрсетілген кезең ішінде 10 мыңнан астам мектеп жасына дейінгі балалар, 2 мыңнан астам мүгедек, ардагерлер мен оларға теңестірілген адамдар, 14 мыңнан астам мектеп оқушылары, студенттер мен зейнеткерлер болған. Келушілердің саны күн сайын өсіп келеді. Егер бірінші күні келушілердің саны 18 мыңды құраса, өткен жұма күні көрмеде 34 мың келуші болған», - деп ақпараттандырды Б.Қарымсақов.