• Басты
  • Дю Солей немесе қазақ халқының тарихына арналған эксклюзивті шоу (ФОТОРЕПОРТАЖ)
16 Маусым, 2017 20:43

Дю Солей немесе қазақ халқының тарихына арналған эксклюзивті шоу (ФОТОРЕПОРТАЖ)

ЭКСПО-2017 халықаралық мамандандырылған көрмесінің басты мәдени шарасы «Дю Солей циркі» маусымның 15-де журналистерге арналған алдын-ала көрсетілім өткізді. Ал, бүгін Дю Солей циркінің таңдай қақтырарлық «REFLEKT» шоу бағдарламасының премьерасы өтеді.
Дю Солей немесе қазақ халқының тарихына арналған эксклюзивті шоу (ФОТОРЕПОРТАЖ)

Сонымен,  бұл эксклюзивті шоу  бағдарлама арнайы Қазақстан үшін жасалған. Ондай бағдарлама еш жерде болмаған және болмайды да. Оны тек Астанада, ЭКСПО көрмесі аясында ғана тамашалауға  болады.

Тарқатып айтар болсақ, цирктің қойылымдары қазақ xалқының тариxы және салт-дәстүрімен ұштасады.  Алтын адам, самұрық құс, қазақ халқының ұлттық көшпенді мәдениетінің әлементтері ЭКСПО көрмесінің «Болашақ энергиясы» тақырыбымен әдемі үйлесімдік тапқан.

Энергия көзі болып табылатын от, су, ауа, жел - табиғаттың таңғажайып құбылыстары да назардан тыс қалмаған.  Сахнаның екі жағында орналасқан лед экрандар оларды барынша әсерлетіп көрсетеді. Ал, экрандағы көрініске сай әртістердің қойылымы тақырыпты тіптен айшықтайды.

Айта кетерлік жайт, қойылымдарға 37 адам қатысады, ал шоу бағдарламаны дайындауға 160-қа жуық маман атсалысқан.  Және де бұл цирктің өзгелерден ерекшелігі қойылымдарға жануарлар тартылмаған. Барлық трюктарды цирк әртістері өздері орындайды.

Музыкалық сүйемелдеуге келетін болсақ, цирктің әншілері жанды дауыспен ән айтып, түрлі музыкалық шығармаларды орындады. Домбыраның қоңыр даусы заманауи музыкамен әдемі үйлесімдік тапқан.

Ал, әртістердің киімін бөлек әңгіме деуге болады. Цирк өнерпаздары үшін арнайы тіктірілген киімдер қазақтың ұлттық ою-өрнегімен көмкерілген. Сондай-ақ көшпенділердің әбзелдері - садақтар, сауыт-саймандар да бар. Рас, киімдер қазақ халқының ұлттық киімімен сайма сай келеді деуге болмайды, алайда қазақ халқының тарихы мен мәдениетінен әсер ала отырып жасалғаны анық байқалады.  

Жалпы, цирк тарапынан 2017 жылдың 10 маусымынан 10 қыркүйегіне дейін 71 қойылым жоспарланып отыр. Цирк қонақтары бірегей шоуды арнайы жабдықталған төртбұрыш тәріздес павильонда тамашалайды. Оның сыйымдылығы 2000 көрерменге арналған. 

Естеріңізге сала кетейік, бүгінде штаб-пәтері Монреаль қаласында орналасқан дю Солей Циркі ұжымында әлемнің 50 елінен жиналған 4000 жуық адам еңбек етеді, оның 1300-і – әртіс. Әлемге әйгілі дю Солей циркі осы уақытқа дейін 400-ден астам шаһарда өнер көрсетіп үлгерген.

Мөлдір Бекбергенова 

Барлық жаңалықтар