Ерболат Досаев АЭФ аясында бірқатар кездесулер өткізді
Кездесу барысында Ерболат Досаев Дүниежүзілік банктің Еуропа және Орталық Азия бойынша вице-президенті Сирил Мюллерді Қазақстанға тікелей инвестициялар тарту процесіндегі Холдингтің рөлі туралы ақпараттандырып, Дүниежүзілік банк тобымен әріптестіктің басым бағыттары жөнінде пікір алмасты.
«Қазақстан Республикасының Үкіметі әзірлеген Инвестициялар тарту бойынша ұлттық стратегия шеңберінде «Бәйтерек» холдингі мүдделі компанияларға «бір терезе» қағидасы бойынша қаржы құралдарын ұсынады, және техникалық қолдау көрсетеді», - деді Ерболат Досаев.
Кездесу қорытындысы бойынша тараптар әріптестік орнатуға мүмкіндік беретін бағыттар бойынша ақпарат алмасатын болып келісті.
Ведомствоның мәліметінше, Астана экономикалық форумының алаңында Ерболат Досаев «Verno Capital» басқарушы компаниясының аға серіктесі, инвестициялық стратегиялар бойынша басқарушысы Роланд Нэшпен кездесу өткізді. Тараптар инфрақұрылым, тағам өнеркәсібі және қаржы тартуға мүдделі экономиканың басқа да басым бағыттары бойынша біріккен инвестициялық жобалардың жоспарын құру мәселелерін талқылады.
Халықаралық қаржы корпорациясының басшылығымен өткен кездесуде тараптар мемлекеттік-жекеменшік серіктестік, шағын және орта бизнес бастамаларын қолдау бойынша әріптестік аясын кеңейту мәселесін қарастырды. Одан бөлек, тараптар Халықаралық қаржы корпорациясы арқылы «Нұрлы жол» бағдарламасы аясында энерготиімді тұрғын үй құрылысын қаржыландыру мүмкіндігін талқылады.
Сонымен қатар, «Бәйтерек» ұлттық басқарушы холдингі» АҚ Басқарма төрағасы Ерболат Досаев «The Boston Consulting Group» Директорлар кеңесінің төрағасы Ханс-Пол Брюкнермен және «Thomson Reuters» ТМД елдері бойынша басқарушы директоры Петр Марчевскиймен кездесті.
Кездесу барысында «Бәйтерек» холдингі басшысы қонақтарды Холдинг пен оның еншілес ұйымдары қызметтерінің негізгі бағыттарымен таныстырды. Олардың ішінде – ірі индустриялық және инфрақұрылымдық жобаларды дамыту, шағын және орта бизнесті қолдау, тұрғын үй құрылысын дамыту, сондай-ақ технологияларды, инновацияларды трансферттеу және экспортты қолдау арқылы экономиканы әртараптандыру.
«Бәйтерек» ұлттық басқарушы холдингі» АҚ мерейтойлық Х Астана экономикалық форумының ресми әріптесі болып табылады.Форумның биылғы тақырыбы – «Жаңа энергия – Жаңа экономика».
