Рихард Шенц: Австрияның павильоны негізінен отбасыларға бағдарланған (ФОТО)

14 Маусым, 2017 15:10

ЭКСПО-2017 көрмесіндегі барлық павильондардың арасында Австрияның павильоны басқаларынан едәуір ерекшеленеді. Альпылық Республика өз павильонын ойын түрінде ұсынған. Павильонмен ЭКСПО-2017 көрмесі аясындағы Австрияның Ұлттық күні барысында Австрия Үкіметінің ЭКСПО-2017 бойынша комиссары Рихард Шенц таныстырып өтті.

«Австрия Үкіметінің ЭКСПО-2017 бойынша комиссары және Австриялық-қазақстандық қоғам президенті ретінде біз өз павильонымызды әлем бойынша жаңа технологияларды дамытатын тұғырнама ретінде пайдаланатынымызды атап өткім келеді. Австрия өзін көптеген жоғары технологиялары бар ел және Қазақстан үшін күшті, сенімді, экономикалық әріптес ретінде танытады. Біз осы тұғырнаманы «Болашақтың энергиясы» тақырыбы бойынша ең озық технологияларды ұсыну және қонақтарды елімізбен таныстыру үшін пайдаланбақпыз», - деді Р. Шенц.

Австрия павильоны негізінен отбасыларға бағдарланған.

«Біздің павильонымыздың мақсаты энергия тақырыбын ойын түрінде ұсыну. Біз өз павильонымызды негізінен отбасыларға арнадық. Сондай-ақ, жаңа экономикалық өзара қарым-қатынастар құрып, қолданыстағы бизнес-байланыстарды нығайта алатын экономикалық бағдарлама ұсынамыз», - деп қосты Р. Шенц.

Рихард Шенц ақпараттандырғандай, Австрия ЭКСПО көрмесі аясында қосымша іс-шаралар ұйымдастырады, солардың бірі 4 шілдеде өтетін Технологиялар күні.

Негізгі тақырыптар – гидроэнергетика, күн энергетикасы және Smart city интеллектуалды қаласы.

«Энергия тиімділігі тақырыбына ерекше назар аударғым келеді, себебі бұл энергияны үнемдеуге мүмкіндік береді. Австрия барлық әлемде «Болашақтың энергиясы» тақырыбы бойынша жетекші рөл атқарады. Осы технологиялар қоршаған ортаның ластануын төмендетіп қана қоймай, сонымен қатар, жаңа жұмыс орындарын ашуға да мүмкіндік береді. Әрбір 20-шы орын жасыл энергиялар саласына келеді. Қазақстан экспорттық әлеует бойынша Ресей мен Украинадан кейін үшінші орынды алады», - деп атап өтті Комиссар.