Қазақстанда АҚШ-пен бірлескен 500-ге жуық кәсіпорын бар

14 Маусым, 2017 12:57

Қазақстан ЕАЭО, Қытай, Орталық Азия мен Таяу Шығыс елдері нарығына жөнелтілетін өнімдердің өндісріс алаңы болып табылады. Бұл туралы ҚР инвестициялар мен даму министрі Жеңіс Қасымбек Астанадағы Қазақстан-Америка бизнес форумында хабарлады.

«Қазақстан Еуразиялық экономикалық одаққа кіреді. Бұл кедендік шекарасы жоқ, 180 млн-нан астам халқы бар, сыртқы тауар айналымы шамамен 1 трлн доллар бірыңғай нарық. Біз Қытаймен жақын орналасқанбыз, ол АҚШ-тан кейінгі экономикасы үлкен мемлекет», - деді ведомство басшысы.

Министр атап өткендей, Қазақстанда инвестиция тарту үшін барлық қолайлы жағдайлар жасалған.

Бүгінде Қазақстанда 10 арнайы экономикалық аймақ пен түрлі салаларға бағытталған 20-ға жуық индустриалды аймақ жұмыс істейді. АЭА қатысушыларына рұқсат беру процедураларын жеңілдету және жеңілдіктер топтамасы қарастырылған.

Сонымен қатар, үш мемлекеттік бағдарлама жүзеге асырылуда, атап айтар болсақ, «Нұрлы жол» - көліктік-логистикалық, индустриалды, энергетикалық инфрақұрылымды дамытуға бағытталған. «Нұрлы жер» тұрғын үй құрылысы бағдарламасы және 2020 жылға дейін индустриалды-инновациялық дамыту бағдарламасы - ол қайта өңдеу саласында жоғары технологиялық экспортқа бейімделген өнімді өндіруге бағытталған. Мұнда түрлі мемлекеттік қолдау шаралары бар: несие бойынша пайыздық үстемақыны субсидиялау, сервистік қызмет көрсету, инвестициялық және салықтық артықшылықтар.

Айта кетерлік жайт, елімізде түрі салаларда америкалық капиталдың қатысуымен бірлескен 500-ге жуық кәсіпорын жұмыс істейді. Соңғы он жылда Қазақстанға тікелей инвестиция ағымы 265 млрд. доллардан асып жығылды.

Қайрат Жандыбаев

Барлық жаңалықтар