Түркияда Жамбыл Жабаев атындағы көшенің салтанатты ашылуы өтті

13 Маусым, 2017 18:11

Түркия еліндегі «Қазақстан күндері» аясында Оңтүстік Қазақстан облысының өнерпаздары өнер көрсетті, деп хабарлады аймақ әкімдігі.

Шара Кечиөрен муниципалитеті мен Оңтүстік Қазақстан облысы әкімдігі тарапынан ұйымдастырылған. Елбасының «Болашаққа бағдар: рухани жаңғыру» мақаласы мен Қазақстан мен Түркия арасындағы дипломатиялық қарым-қатынастардың 25 жылдығына орай ұйымдастырылған мемлекетаралық маңызды шараға Оңтүстік Қазақстан облысынан 42 делегат келді.

«Қазақстан күндерінің» шеңберінде Анкара қаласында «Жамбыл» атындағы көшенің салтанатты ашылу рәсімі, «Болашаққа бағдар: рухани жаңғыру» атты халықаралық ғылыми-практикалық конференциясы және Халықаралық 8-ші Рамазан фестивалінің аясында «Қазақстан кеші» атты концерт өтті.

Күтіліп отырғандай, арнайы аттанған өнер делегаттары Түркия мемлекетінің Анкара, Адана, Мерсин, Ыстанбұл қалаларында концерттік бағдарлама ұсынады.