Буркина-Фасо ИЫҰ Саммитіне қатысатынын растады

13 Маусым, 2017 12:27

Қазақстанның Мысырдағы Елшісі Арман Исағалиев Каир қаласына ресми сапармен келген Буркина-Фасоның Президенті Роч Марк Кристиан Каборемен кездесті. Кездесуде Буркина-Фасо ИЫҰ Саммитіне қатысатындығы расталды.

ҚР СІМ хабарлағандай, Елші Буркина-Фасо көшбасшысына Қазақстанның Президенті Нұрсұлтан Назарбаевтың 2017 жылғы 10-11 қыркүйекте Астана қаласында өтетін Ислам ынтымақтастығы ұйымының Ғылым және технологиялар жөніндегі бірінші Саммитіне шақыруын табыстады.

Елші әлеуметтік-экономикалық даму, ғылыми-техникалық прогресс, модернизациялау және кедейшілікпен күресу сияқты ислам әлемінің өзекті мәселелерін бірлесіп шешу жолдарын қарастыратын форумның жұмысына Буркина-Фасоның қатысуы өте маңызды екенін атап өтті.

Р.М. Каборе шақыруды ризашылықпен қабыл алып, өз елінің Астана Саммитіне жоғары деңгейде қатысатынын растады.

Ол Казақстанды Буркина-Фасо үшін жан-жақты қатынастарды дамытуды және нығайтуды қажет ететін Орталық Азиядағы достас әрі маңызды мемлекет ретінде ынтымақтастықты дамыту керектігін айтты.

Барлық жаңалықтар