Астанада Қазақстанның ЮНИДО жобаларына қатысу мәселесі талқыланды

12 Маусым, 2017 16:23

Қазақстан Республикасының Премьер-Министрі Бақытжан Сағынтаев Үкімет үйінде Біріккен Ұлттар Ұйымының өнеркәсіптік даму жөніндегі ұйымының (ЮНИДО) бас директоры Юн Лимен кездесу өткізді, деп хабарлады primeminister.kz.

Кездесу барысында Қазақстан Үкіметі мен ЮНИДО арасындағы арнайы келісім аясында Мемлекет басшысы Н. Назарбаевтың бес институционалдық реформаларын, Қазақстан экономикасын жедел технологиялық жаңғыртуды, Индустриалды-инновациялық даму мемлекеттік бағдарламасын іске асырудағы ынтымақтастық мәселелері талқыланды.

Сондай-ақ, Қазақстанның өнеркәсіптік статистика, өнеркәсіптік бірігу және өнеркәсіптің қоршаған ортаға тигізетін жағымсыз әсерін төмендету секілді салаларда ЮНИДО-ның өңірлік жобаларына қатысуын жалғастыру мәселелері қаралды.

ЭКСПО-2017 көрмесіне ерекше назар аударылды, тараптар, соның ішінде, ЭКСПО базасында Халықаралық «жасыл» технологиялар орталығы мен «Болашақ энергиясы» инвестициялық жобаларын құру бойынша бірлескен жұмыстарға дайындық барысын талқылады.

ЭКСПО көрмесіндегі БҰҰ күні 13 маусымда аталып өтеді. БҰҰ павильонының тақырыбы – «Тұрақты даму энергиясы».