• Басты
  • ЭКСПО кезінде қанша пойыз бен автобус қызмет көрсетеді
12 Маусым, 2017 12:00

ЭКСПО кезінде қанша пойыз бен автобус қызмет көрсетеді

Тұрғындардың ЭКСПО кезінде қанша автобус пен пойыз жұмыс істейді және Астанаға кіру кезінде кедергі туындамай ма деген сұрақтарына Инвестициялар және даму министрі Жеңіс Қасымбек халық алдында есеп беру кезінде жауап берді.
ЭКСПО кезінде қанша пойыз бен автобус қызмет көрсетеді

Инвестициялар және даму министрі хабарлағандай, Қазақстанның барлық өңірлерінен Астанаға келетін адам саны  1,8 млн адамды құрайды.

«Олардың басым бөлігі пойызбен келеді. Осы орайда, біз пойыздардың бағытын екі есеге арттырдық.  Егер қыста  27 пойыз жүрсе, бүгін  54 пойыз жұмыс істейді. Мәселен, Шымкентке  2 пойыз жүреді. 54 пойыздың  тең жартысы  Астананың жаңа вокзалы арқылы өтеді. Ал ескі вокзалдан пойыздар Көкшетау және Петропавл қалаларына қарай бағыт алады», - деді министр.

Сондай-ақ, Жеңіс Қасымбек айтып өткендей, Астанаға келетін автобустар саны да артты.

«Егер осыған дейін  60 автобус жұмыс істесе, қазір олардың саны екі есеге артты. Бүгінде  өңірлерден елордаға келетін автобустар саны жетерлік. Астанада  3 автобус станциясы бар. Демек, «Сапаржайдан» басқа тағы екі автостанция  ашылды», - деді ол.

Министр айтып өткендей, автобус станциялары  «Шанхай»  нарығының жанында және қарағандылық жол бойындағы  «Кең дала»  гипермаркеті жанында бар.

Айта кетейік, есептік  кездесу барысында  Инвестициялар және даму министрі Жеңіс Қасымбек өңдеу экспорты   көлемінің азаю себебін анықтап, биыл оны арттыруға сөз берді.

Ақбота Күзекбай

Барлық жаңалықтар