Мемлекеттік қызметшілер жобалық басқару негіздеріне оқытылады

3 Маусым, 2017 15:11

5-9 маусымда Қазақстан Республикасы Президентінің жанындағы Мемлекеттік басқару академиясында мемлекеттік қызметшілер үшін "Жобалық менеджмент негізінде "Рухани жаңғыру" бағдарламасын іске асыру" тақырыбына бес күндік тренинг өтеді.

Тренингтің бірегейлігі оқыту барысында қатысушылардың қолданыстағы мемлекеттік бағдарламаны іске асыруға бағытталған жобаларды әзірлеуінде.

Тренингке Президент Әкімшілігінің мемлекеттік инспекторлары, облыс әкімдерінің орынбасарлары, вице-министрлер және мемлекеттік органдардың қызметкерлері қатысады.

Жобаларды әзірлеу барысындағы сарапшылар кіші бағдарламалардың жетекшілері: білім және ғылым министрі Е.Сағадиев, мәдениет және спорт министрі А.Мұхамедиұлы, ақпарат және коммуникациялар министрі Д.Абаев, дін істері және азаматтық қоғам министрі Н.Ермекбаев болады.

Тренинг Президенттің "Болашаққа бағдар: рухани жаңғыру" мақаласында айтылған "Рухани жаңғыру" патриоттық бағдарламасын іске асыруға тартылған мемлекеттік қызметшілердің тиімділігін арттыруға бағытталған.

Мемлекеттік ұйымдардың, орталық және жергілікті атқарушы органдардың 150 қызметкері жобаларды әзірлеу бойынша бір топ болып жұмыс істейтінін айта кету керек.

Тренингтің жабылуында "Рухани жаңғыру" бағдарламасын іске асырудың негізіне айналатын жобалар мен бағдарламаларды қорғау жоспарланған.

«Тренинг нәтижесі жобалық менеджменттің заманауи құралдарын пайдалана отырып, мемлекеттік басқарудың әр түрлі деңгейлерінде жобалық офистердің жұмысына мемлекеттік қызметшілерді тарту болмақ», - делінген хабарламада.

Жобалық офистерді енгізу Қазақстанда іске асырылатын мемлекеттік бағдарламалардың тиімділігі мен нәтижелілігін арттырады.

Тренингті халықаралық стандарттар бойынша сертификатталған Академия оқытушылары өткізеді.