Қазақстанда саяси қуғын-сүргін құрбандарының электрондық дерекқоры іске қосылды
База репрессия жылдары зардап шегіп, қаза тапқан қазақстандықтардың есімдері сақталған ең толық электрондық ресурсқа айналады. Базада ҰҚК мұрағаттарынан, көп томдық "Қайғы кітабынан" алынған 200 мыңға жуық есім, сондай-ақ республиканың өңірлік мұрағаттарынан алынған деректер болмақ. База нақты уақыт режимінде толтырылып отырады. Ол National Digital History веб-порталында қолжетімді.
Кез келген ниет білдіруші дерекқорды толтыруға қатыса алатынын айта кету керек.
Ол үшін репрессия жылдары зардап шеккен жақын туыстар туралы деректерді kaz.ehistory@gmail.com электрондық мекенжайына жіберу қажет.
Еске сала кетейік, ҚР Президентінің 1997 жылғы 31 мамырдағы Жарлығымен Қазақстанда Саяси қуғын-сүргін құрбандарын еске алу күні жарияланды. Тарихшылардың деректері бойынша, 1937-1938 жылдары республикада 100 мыңнан астам тұрғын репрессияға ұшыраса, олардың төрттен бір бөлігі толығымен жойылған.
