• Басты
  • Ақтөбе облысында туристік портал іске қосылмақ

Ақтөбе облысында туристік портал іске қосылмақ

31 Мамыр, 2017 10:13
Ақтөбе облысында жаңа туристік бағдарлар іске қосылады. Бұл туралы рухани жаңғыру бағдарламасын іске асыру жөніндегі облыстық комиссияның кеңейтілген отырысында белгілі болды.

«Қазақстанның киелі жерлерінің географиясы» жобасы аясында облыстың негізгі көрікті жерлері, тарих және мәдениет объектілері сипатталған туристік карталар, кітапшалар мен жол нұсқарлары әзірленіп жатыр. Бүгінгі таңда өңірдің 50 тарихи-мәдени мұра объектісінен тұратын тізім құрастырылды. Балаларды ұлттық мәдениет пен оның құндылықтарына тарту мақсатында, оқушылар үшін облыс аудандарының, сондай-ақ Алматы қаласының, Жамбыл, Оңтүстік Қазақстан және Қызылорда облыстарының көрікті жерлері бойынша туристік экскурсиялар ұйымдастырылады», - делінген облыс әкімдігінің хабарламасында.

Бұдан бөлек, жергілікті және халықаралық ауқымдағы алаңдарда облыстың туристік әлеуетін ақпараттық насихаттау және ілгерілету көзделген. Осы мақсатта Ақтөбе облысының ресми туристік порталы, негізгі тарихи-мәдени мұра объектілері туралы бейнероликтер жасалатын болады.

Сонымен бірге, «Туған жер» бағдарламасын тиімді іске асыру үшін жұмыс тобы және сарапшылар кеңесі құрылады, ақпараттық қамтамасыз ету бойынша медиажоспар әзірленеді.

Бұдан бөлек, Құдайберген Жұбанов атындағы өңірлік мемлекеттік университет базасында жобалық кеңсе ашылды. Облыс тумаларын біріктіруі тиіс www.zherlester.akt.kz сайты ашылды. «Туған жерге тағзым» патриоттық акциясы аясында жалпы құны 1 млрд 659 млн теңгені құрайтын жобалар іске асырылуда.

Рухани жаңғыру бағдарламасын іске асыруға өңірдің ғалымдар бірлестігі де белсенді түрде тартылуда. Қ.Жұбанов атындағы өңірлік мемлекеттік университет базасында жобалық кеңседен басқа, «Қазына» кешенді зерттеу орталығы құрылды, өзекті ғылыми жобалар әзірленуде.

Сондай-ақ, отырыс барысында «Жаһандық әлемдегі заманауи қазақ мәдениеті», «Әлемнің 100 үздік оқулығы», «Қазақстанның 100 жаңа есімі» жобаларын және Елбасы ұсынған бағдарламаның басқа да бағыттарын іске асыру туралы ақпарат айтылды.

Барлық жаңалықтар