Г. Әбдіқалықова «Әл-Фейсал: Әділдік және батылдық жолы» атты көрмені аралады (ФОТОРЕПОРТАЖ)

18 Мамыр, 2017 15:18

Қазақстан Республикасының Мемлекеттік хатшысы Гүлшара Әбдіқалықова Сауд Арабиясының Королі Фейсал ибн Абдул-Әзиз әл-Саудтың өмірі мен қызметіне арналған «Әл-Фейсал: Әділдік және батылдық жолы» атты көрмені аралады, деп хабарлады Ақорданың баспасөз қызметі.

Іс-шараны Король Фейсал атындағы Исламды зерттеу орталығы ұйымдастырып отыр. Орталық исламның әлемдік тарихтағы орны мен рөлін зерделеу, ислам құндылықтарын, мұсылмандық мәдениет мен өнерді ілгерілету мақсатымен 1983 жылы құрылған. Сонымен қатар, ол Сауд Арабиясының жетекші ғылыми және мәдени-ағартушылық орталығының бірі болып саналады.

Көрменің ашылу рәсімінде Мемлекеттік хатшы Гүлшара Әбдіқалықова мен ханзада Түрки әл-Фейсал әл-Сауд құттықтау сөз сөйледі.

"Мұндай көрме ТМД елдері аумағында тұңғыш рет ұйымдастырылып отыр. Экспозиция Сауд Арабиясының Король Фейсал басқарған (1964-1975 жж.), сауд қоғамы өмірінің барлық саласына ықпал еткен ауқымды реформалар жүргізілген тұстағы тарихи кезеңіне арналған", - деп атап өтті сөз сөйлегендер.

Көрмеге сирек кездесетін тарихи жәдігерліктер, сондай-ақ Король Фейсалдың жеке өзі тұтынған заттары – қару-жарағы, марапаттары, архивтік құжаттары, фотосуреттері мен басқа да мұралары қойылған.

Сонымен қатар, іс-шара барысында қазақ және орыс тілдерінде жарық көрген «Әл-Фейсал: Әділдік және батылдық жолы» атты кітап көпшілік назарына ұсынылды.

Барлық жаңалықтар