Пробация қызметі бас бостандығынан айыру орындарынан шыққан 7 мыңға жуық адамға қолдау көрсеткен

18 Мамыр, 2017 14:32

2017 жылдың алғашқы төрт айында Пробация қызметі бас бостандығынан айыру орындарынан шыққан 6 705 адамға қолдау көрсетті. Бұл туралы ҚР ІІМ Қылмыстық-атқару жүйесі комитеті төрағасының орынбасары Бекболат Төремұратов ОКҚ-да өткен брифинг барысында мәлімдеді.

Бас бостандығынан айыру орындарынан шыққаннан кейін өмірін жаңадан бастағысы келген қазақстандықтарға жұмысқа орналасу мен білім алуда, құжаттарын қалпына келтіруде көмек және психологиялық қолдау көрсетілді.

Пробация қызметі қылмыстық-атқару жүйесі мекемелерінен босап шыққан адамдардың бейімделуіне көмек көрсетеді. 633 адам жұмысқа орналастырылды, 2637 адамға психологиялық қолдау көрсетілді, 1493 адам емдеуден өтті. Жалпы, 6705 қазақстандық "100 нақты қадам" Ұлт жоспарының арқасында жаңа өмір бастаған.

«Ұлт жоспарының 33-қадамын іске асыру үшін үлкен жұмыс атқарылды. Бас бостандығынан айыру орындарынан босап шыққан адамдардың пробациясында ілгерілеу бар. 2015 және 2016 жылдарды талдайтын болсақ, соңғысында қайта жасалған қылмыстар саны 25-30%-ға азайған», - деп атап өтті Б.Төремұратов.

Жергілікті атқарушы органдар пробацияны іске асырудың негізгі субъектілері болып табылатынын атап өту қажет. Пробация қызметіне қоғамдық бірлестіктер мен өзге де заңды тұлғалар, сондай-ақ халықаралық үкіметтік емес ұйымдар көмек көрсете алады.

Барлық жаңалықтар