• Басты
  • "Астана Опера" Ресейдің Үлкен театрымен ынтымақтастық орнатпақ

"Астана Опера" Ресейдің Үлкен театрымен ынтымақтастық орнатпақ

18 Мамыр, 2017 12:09
«Астана Опера» және Ресейдің Үлкен театры ынтымақтастық туралы меморандумға қол қойды, деп хабарланды қазақстандық театрда.

Ресейдің басты ұлттық театры – атақты Үлкен театр  Қазақстандағы үздік «Астана Опера» театрымен тығыз ынтымақтастық жасайды. Мәскеуде өткен екі жақты келіссөздер нәтижесінде Ынтымақтастық туралы меморандумға қол қойылды. Келісім Ресейдегі Қазақстан Елшілігінің қолдау көрсетуімен жүзеге асты.

«Астана Опера» театрының директоры Ғалым Ахмедьяров және Ресейдің Үлкен театрының бас директоры Владимир Урин қол қойған меморандумға сәйкес, тараптар бірнеше бағыт бойынша серіктестікті дамытады. Келіссөз барысында бірқатар жобалар талқыланды. Мамандармен, әртістермен, орындаушылық ұжымдармен өзара тиімді тәжірибе алмасумен қатар алдағы жоспарға гастрольдерді, бірлескен қойылымдарды ұйымдастыру, екі театрдың жетекші солисттерінің шеберлік сабақтарын өткізу және  музыкалық байқаулар мен фестивальдарға қатысу кіреді.

«Қазақстан Республикасының Президенті Н.Ә. Назарбаевтың рухани жаңғыру жөнінде атап өткен міндеттерінің бірі, заманауи қазақстандық мәдениетті әлемдік кеңістікке паш ету болып табылады. Бұл Елбасы айқындап бергендей, ұлттық мәдениеттің үздік туындыларын таңдап қана қоймай, оларды шетелде танытатын өте маңызды және көп еңбекті қажет ететін жұмыс. Меморандумға қол қою Мәдениет және спорт министрлігінің Елбасымыздың стратегиясын іске асыруға бағытталған жоспарларының бір бөлігі», - деп атап өтті Ғалым Ахмедьяров.  

Ресейдің Мемлекеттік академиялық Үлкен театры – аталған елдің театр өнерінің дамуына ықпал еткен ресейлік және әлемдік музыкалық мәдениет дәстүрлерін танытушы. Оның негізі 1776 жылғы 28 наурызда қаланған. 

Барлық жаңалықтар