Мақтааралдық мектеп республика бойынша үздік үштікке енді
Былтырғы оқу жылында мектеп бітірген 70 түлектің 57-сі «Алтын белгі» үміткері болып, оның 40-ы үмітті ақтап шыққан. Жыл сайын жалпы орта баллдың көрсеткіші бойынша ОҚО-да көш бастап жүретін мектеп республика бойынша алдыңғы үштіктен түспейді.
Мектеп директоры Өмірхан Қозыбақтың айтуынша, мұндай нәтижеге қол жеткізу талай жылдан бергі жұмыстың нәтижесі. Бұл мектептің тағы бір ерекшелігі, басқару жүйесі жаңа заманға сай лайықталған.
«ҰБТ сынағына дайындалуда, «Алтын белгі» мен үздік аттестатты көбірек алуымызда ешқандай құпия немесе жасырын сыр жоқ. Біздің мектепте апта сайын 10-11 сынып оқушыларынан байқау сынағы алынады. Төмен балл жинаған оқушылармен жеке жұмыс жасалады. Әр жыл сайын пән мұғалімдері жаңа сұрақтармен толықтырып, жаңа тест варианттарын кіріктіріп отырады»,- деді мектеп директоры Өмірхан Қозыбақ.
Бұдан басқа, мектеп-гимназияның тағы бір ерекшелігі – математика пәнін оқытуға айрықша назар аударады. Бұл – тек осы пәнге артықшылық жасау емес. Математика арқылы өзге сабақтарды оқытудың да сапасын арттыра түсуді мақсат етеді. Бұл оқу орнын Мақтааралдың алтын мектебі десе де әбден жарасады.
