17 Мамыр, 2017 11:03

ЭКСПО негізінде Жасыл технологиялар орталығы құрылады

Астанадағы Жасыл технологиялар орталығы Орталық Азия, Иран, Ауғанстан, Моңғолия мен Әзербайжан елдерінде жасыл экономиканы дамыту жұмыстарын жүргізетін болады. Бұл туралы ҚР ЭМ жаңартылған энергия көздері департаментінің директоры Айнұр Соспанова ОКҚ-дағы брифингте хабарлады.

Қазақстанның Энергетика министрлігі БҰҰ Даму бағдарламасымен бірлесіп Астанадағы Жасыл технологиялар орталығы тұжырымдамасын жасақтады.

Орталық ЭКСПО негізінде бірнеше жыл ішінде құрылады және ол бірінші кезекте орталықазиялық аймақта жасыл технологиялардың дамуына оң әсер ету керек.

Соспанованың айтуынша, орталық Орталық Азияға — Қазақстан, Өзбекстан, Қырғызстан, Тәжікстан, Түркіменстан, сонымен қатар Иран, Ауғанстан, Моңғолия мен Әзербайжанға бағытталады және Экономикалық ынтымақтастық және даму ұйымының елдерімен, Еуропалық одақпен, Ресей, АҚШ, Қытай, Үндістан, мен Латын Америка мемлекеттерімен ынтымақтастық орнатылады.

«Орталықта жасыл экономиканың сегіз секторы бойынша жұмыс істеледі, олар жасыл технологиялар трансфертіне, ғылыми-технологиялық ортаны қалыптастыруға, ел саясатын жасақтауға арналады», - деп түсіндірді ол.

Айта кетерлік жайт, «Жасыл» технологияларды дамыту бойынша халықаралық орталықты және «Астана» халықаралық қаржы орталығын құру туралы ұсынысты Мемлекет басшысы Нұрсұлтан Назарбаев БҰҰ Бас Ассамблеясының отырысында жариялаған болатын.

Барлық жаңалықтар