ОҚО-да концентрат байытатын цех іске қосылмақ
16 Мамыр, 2017 17:57
Кентауда биылғы жылғы шілдеде «Кентау полиметалл» ЖШС түсті металдар концентратын байыту жұмысын бастайды. Жобаның жалпы құны – 650 млн теңге. Заттай көріністегі қуаттылығы жылына 15 000 тонна дайын концентратты құрайды, деп хабарлады ОҚО әкімдігі.
«Шикізат ретінде Ақтөбе облысында орналасқан «Юбилейный» алтын кен орны мен Созақ ауданындағы «Күмісті» шашыраңқы алтын орындарының кенін пайдаланамыз. Инвестициялық жоба екі кезеңнен тұрады. Жоба толығымен жүзеге асып, іске қосылғанда «Қазмырыш» АҚ және «Қазақмыс» АҚ қарасты өндірістік кәсіпорындарын дайын өніммен қамтамасыз ететін боламыз», - деді «Кентау полиметалл» ЖШС инженер –құрылысшысы Азамат Сүлейменов.
Қазіргі таңда серіктестік «Мырғалымсай» кен орнының бұрынғы ғимаратын сатып алған. Бүгінде мұнда негізгі өндірістік цехтарды монтаждау жұмыстары жүргізіліп жатыр.
Құрал-жабдықтардың басым бөлігі Қытай елінен сатып әкелінген. Егер жоба толығымен іске асса, 110 адам тұрақты жұмыспен қамтылатын болады.
