"Самұрық-Қазына" АҚ бірқатар қытайлық компаниямен ынтымақтастық жасайды
Бейжіңде Ақмола облысындағы Масал титан-магнетит (құрамында ванадий бар темір) кен орны базасында тау-кен металлургиялық кешенін салу бойынша екі келісімге қол қойылды. «Масал тау-кен байыту комбинаты» ЖШС мен China National Technical Import and Export Corporation қытайлық корпорациясы (бұдан әрі — CNTIC) арасындағы шартты келісім тау-кен металлургиялық кешені құрылысына мердігер шартын жасау ниетін қарастыруда. Кешен кен өндіруден бастап жоғары маркалы болаттың түрлі сұрыптарын шығаруға дейінгі тізбектен құралады деп жоспарланған. Масал кен орнында С1 және С2 санаттары бойынша кеннің жиынтық пайдалану қорлары 729 млн тоннаны құрайды. Сондай-ақ, «Масал тау-кен байыту комбинаты» ЖШС мен ҚХР Эксим Банкі арасында жобаны қаржыландыру туралы шартты келісімге қол қойылды.
Бұдан бөлек, Қордың ірі қоржындық компанияларының бірі — «Қазақстан Темір Жолы» ҰК» АҚ Бейжіңде «KTZE — Khorgos Gateway» ЖШС-де 49% қатысу үлесінің сатып алу-сату шартын жасасты. Қытай тарапынан құжатқа China COSCO Shipping Corporation Limited пен «Ляньюнган порты» КТ» ЖШҚ қол қойды. Зәкірлік стратегиялық инвесторларды тарту «Қорғас — Шығыс қақпасы» АЭА Құрғақ порты арқылы транзиттік жүктер көлемдерінің өсімін қамтамасыз етеді.
«Самұрық-Қазына» АҚ басқарма төрағасы, сондай-ақ қазақстандық тараптан Қазақстан-Қытай Іскерлік Кеңесінің (бұдан әрі — ҚҚІК) тең төрағасы болып табылатын Өмірзақ Шөкеев Бейжіңдегі «Бір белдеу, бір жол» Халықаралық ынтымақтастық форумына қатысу аясында бірқатар кездесулер өткізді. «Самұрық-Қазына» Қорының басшысы «CITIC Group» директорлар кеңесінің төрағасы, қытайлық тараптан ҚҚІК тең төрағасы болып табылатын Чан Чжэньминмен кездесті. Өмірзақ Шөкеев пен Чан Чжэньмин жаңа жобалар аясында ынтымақтастық мүмкіндігін, сондай-ақ таяу уақытта Астанада өткізуге жоспарланған алдағы ҚҚІК төртінші отырысының күн тәртібін талқылады.
