Жаңа қондырғы Қазақстанның шалғайдағы аудандарын электр энергиясымен қамтамасыз етуге көмектеседі
ОҚО әкімдігінің баспасөз қызметі хабарлағандай, өңірдің шалғайдағы елді мекенінде орналасқан шаруа қожалықтарын электр энергиясымен және ауыз сумен қамтамасыз ету мақсатында энергетика саласындағы жаңа инновациялық технологияларды дамытуда бірқатар ғылыми-зерттеу жұмыстар жүргізіліп жатыр.
Екі жақты кездесуге тараптар Германия мемлекетінің Юлих қаласындағы Күн энергетикасы институтының арнайы жобасын Оңтүстік Қазақстан облысында жүзеге асыру жайын талқылады.
Жоғарыда аталған бірлескен жобаның негізгі мақсаты арнайы жылжымалы қондырғылар орнату арқылы Қазақстанның шалғайда тұратын фермерлер мен мал шаруашылығымен айналысатын шағын бизнес өкілдерін электр энергиясымен және ауыз сумен қамтамасыз ету болып табылады.
Бұл арнайы жылжымалы қондырғы көбінесе күн энергиясын пайдалану арқылы жұмыс істей алады. Жоба нақты зерттеліп қондырғылар облысымызға орнатылатын жағдайда қосымша жұмыс орындары ашылады.
Екі ел университетіне ортақ зерттеу жобасы болып табылатын инновациялық жаңа технологияларды дамыту ГФР Білім министрлігі жағынан қаржыландырылады. Кездесу барысында Жақып Құттыбекұлы аталған жобаның облысымызға қажеттілігінің өте жоғары екенін атап өтіп, облыс тарапынан германиялық делегаттарға жан-жақты қолдау көрсетілетіндігін жеткізді.
