Қазақстан түрік компаниясымен ғарыш саласында ынтымақтастық жасайды

15 Мамыр, 2017 10:14
Қазақстан Республикасының Қорғаныс және аэроғарыш өнеркәсібі вице-министрі Марат Нұрғожин бастаған қазақстандық делегация Люксембург қаласында «ICT SpringEurope» атты ғарыш форумына және Стамбул қаласында (Түркия) «IDEF 2017» халықаралық қару-жарақ және әскери техника көрмесіне қатысып қайтты.

ҚР Қорғаныс және аэроғарыш өнеркәсібі министрлігі хабарлағандай кездесу барысында М. Нұрғожин Люксембург Премьер-Министрінің орынбасары – Экономика министрі Этьенн Шнайдермен ғарыш саласындағы перспективалы бағыттар мен ғарыш аппараттарын құрудың мүмкіндіктерін талқылады. Э. Шнайдер екі ел арасындағы өзара түсіністік туралы меморандум жасасу жөніндегі ниеттерін білдірді.

Бұдан бөлек, форум шеңберінде қазақстандық делегацияның басшысы осы іс-шарада өзінің өнімдерін таныстырған әртүрлі компаниялардың өкілдерімен кездесті.

Сонымен қатар, Стамбул қаласында (Түркия) «IDEF 2017» халықаралық қару-жарақ және әскери техника көрмесінде ҚР Қорғаныс және аэроғарыш өнеркәсібі вице-министрі Арман Рамазанов бастаған қазақстандық делегация түрік компаниясымен ынтымақтастық жасау туралы келісті.

«SES.A.» компаниясының өкілдерімен өткен кездесуде тараптар ғарыш қызметін дамыту саласындағы өзара тиімді ынтымақтастықты ретке келтіру жолдарын талқылады. Осы мақсатта, сондай-ақ ғарыш саласындағы ынтымақтастықтың нақты бағыттарын айқындау үшін «SpaceDays-2017» халықаралық семинарының алаңында келесі кездесуді ұйымдастыру туралы шешім қабылданды.

Сонымен қатар, «ICT SpringEurope» көрмесінің шеңберінде қазақстандық делегация Иран мен Франция өкілдерімен келіссөздер жүргізді, сондай-ақ «Luxinnovation», «Basir» және «GovSat» компанияларының өнімдерімен танысты.

Барлық жаңалықтар