Ақмолалық учаскелік инпекторлар 18 қызметтік көлік алды
13 Мамыр, 2017 11:36
Ақмола облысының әкімі Мәлік Мырзалин жергілікті полиция қызметінің жалпыгарнизондық ауыстыру барысында учаскелік инспекторларға 18 жаңа көліктің кілтін табыстады.
Облыс әкімі өз сөзінде қызметін 2016 жылдың қаңтарынан бастаған жергілікті полиция жұмысының нәтижесін тілге тиек етті.
«Өткен жылда қылмыс саны айтарлықтай төмендеді. Жергілікті полиция құқық бұзушылаққа «нөлдік төзімділік» қамтамасыз етуде. Жаңа көліктер сіздердің жеделділікті қажет ететін жұмыстарыңызға көмектеседі деген сенімдемін», – деді әкім.
Әкімдіктің мәліметі бойынша, қызметін атқаруға дайындық деңгейінің тексерісінен учаскелік полицейлер, Көкшетау қаласы ІІБ мамандандырылған полицейлері, облыстық жол-патрульдік полиция батальоны, кинология қызметінің қызметкерлері мен арнайы бөлім жауынгерлері өтті.
