Астанада ЖКО саны 28,6%-ға төмендеді

Қабылданып жатқан шаралар кешеніне қарамастан, жол-көлік жарақаттары проблемасы өзекті күйде қалып тыр. Жыл басынан бері Астанада балалардың қатысуымен болған жол-көлік оқиғаларының 70% -ы жүргізушілердің кінәсінен болған, және зардап шеккен балалардың жартысынан астамы көлік ішінде жолаушы ретінде отырған.

Ағымдағы жылдың 4 айында елордада мақсатты түрде жүргізілген жұмыстың нәтижесінде елордада жол-көлік оқиғаларының саны 28,6%-ға төмендеді, бұған қоса, жолда қаза тапқандар саны 9%-ға азайса, жарақат алғандар қатары 23%-ға кеміген. Елордалық ІІД Жергілікті полиция қызметінің мәліметтеріне сәйкес,  кәмелетке толмаған балалардың қатысуымен болатын апаттардың саны 20%-ға, зардап шеккен балалардың саны 16%-ға азайған, қаза тапқандар жоқ.

Жол-көлік оқиғаларында балалардың жарақаттануының алдын алу мақсатында жазғы демалыс қарсаңында үстіміздегі жылдың 1 мамырынан 1 маусымына дейін елордада «Балалардың жолдағы қауіпсіздігі» республикалық кең ауқымды акциясы өткізілуде.

Акция барысында балалардың жол-көлік оқиғаларында жарақат алуына себеп болатын басты жағдайларға жататын Жол ережелерін бүзу әрекеттерінің жолын кесуге айрықша назар аударылмақ. Полиция қызметкерлері оқушылармен және алып қуыршақтармен бірге жас жаяу жүргіншілерге жарық шашатын білезіктер таратады. Бұл қараңғы кезде пассив қауіпсіздік элементтерін тағып жүру қажеттілігін тағы еске салады.

Айта кетерлік жайт,  жыл басынан бері Астанада рұқсат етілмеген жерде жолдан өткені үшін 5000 жаяу жүргінші әкімшілік жауапкершілікке тартылды.