ҚР Президенті ҚР ҚК 25 жылдығына арналған концертті тамашалады

6 Мамыр, 2017 09:21

Астанада ҚР Қарулы Күштерінің 25 жылдығына арналған «25 жыл - ел тәуелсіздігiн қорғауда!» атты мерекелік концерт өтті. Іс-шараға ҚР Президенті ҚР Қарулы Күштерінің Жоғарғы Бас Қолбасшысы Нұрсұлтан Назарбаев қатысты.

Концерттік кеш Қазақстанның Қарулы Күштерінің күш-қуаты туралы деректі фильм көрсетілімінен басталды. Кеште өнер көрсеткендердің барлығы әскери қызметшілер екенін атап өткен жөн. Кеш бағдарламасына Қарулы Күштердің барлық түрлері әскери бөлімшелерінің үздік шығармашылық күштері, сондай-ақ «Жас Ұлан» республикалық мектебінің және «Арыстан» мамандандырылған лицейінің тәрбиеленушілері, ҚР ҚК Ұлттық әскери-патриоттық орталығының әскери оркестрі мен орталық ансамблі, Әскери қорғаныс күштерінің, Әскери-теңіз күштерінің, десанттық-шабуылдау әскерлерінің, Кадет корпусының ұжымдары қатысты.

Мерекелік бағдарламада қазақстандық әскердің жетістіктері туралы әндер шырқалды. Көрермендерге әр уақыттағы батырларымыздың жарқын бейнесіне арналған арнайы хореографиялық композиция көрсетілді. Домбырашылар құрама ансамблі Құрманғазының «Балбырауын» күйін орындап, көрермендерді қуантты.

Сондай-ақ, қазақстандықтарды ҚР ҚК мерейтойымен құттықтауға арнайы келген ресейлік және қытайлық әскери ансамбльдердің өнер көрсетуі кешке ерекше көңіл-күй сыйлады.

Мерекелік концерттің соңында Елбасының атынан гүлшоқтары табыс етілді.

Ақбота Күзекбай

Барлық жаңалықтар