Бухарест қаласында Румынияның ұлттық ЭКСПО-павильоны таныстырылды
Іс-шара «Хория Хулубей» физика және ядролық инженерия ұлттық ғылыми-зерттеу институтының және Румыния-Қазақстан екіжақты сауда-өнеркәсіптік палатасының қатысуымен ұйымдастырылды.
Таныстыруға Қазақстанның елшісі, Физика және ядролық инженерия ұлттық ғылыми-зерттеу институтының бас директоры, академик Николае Замфир, Румыния-Қазақстан екіжақты сауда-өнеркәсіптік палатасының президенті, Қазақстанның Галаце қаласындағы Құрметті консулы Петру Лифичиу, Сыртқы істер министрлігінің, Румынияның іскерлік орта және кәсіпкерлік, академиялық, іскерлер және сарапшылар топтарының өкілдері қатысты.
Қазақстанның Румыниядағы елшісі Дәулет Батрашев қатысушылар алдында сөз сөйлей отыра, алдағы іс-шара туралы толық тоқталып, «ЭКСПО-2017» көрмесіне шақырды.
«Көрме өткізу кезеңінде Астана халықаралық оқиғалар орталығына айналады – ол Шанхай ынтымақтастық ұйымының және Ғылым және технологиялар жөніндегі ислам ынтымақтастығы ұйымының саммиттерін, министрлік кездесулері мен форумдарын өткізеді, қатысушы елдердің ұлттық күндерін, әр түрлі мәдени және спорттық іс-шараларды өткізу орнына айналады», - деп атап өтті ол.
Іс-шара барысында алдағы көрме биылғы жылдың ең ірі халықаралық іс-шарасы болып табылатыны және бизнесті одан әрі дамыту және іскерлік ынтымақтастықты кеңейту үшін жақсы мүмкіндіктер беретіні жайында айтылып, Астанадағы көрме кезінде үш румыниялық экономикалық миссияға дайындық туралы хабарланды.
Румынияның Ұлттық комиссарының Кеңесшісі Кристиан Куташ «ЭКСПО-2017» көрмесіндегі ұлттық павильонының макетімен таныстырды. Н. Замфир және Лазерлік технологиялар ғылыми-зерттеу орталығының мамандары әлемдегі ең күшті лазердің құрылымы бойынша «Extreme Light Infrastructure» (Экстремалды жарық инфрақұрылымы) еуропалық жобасын көрсетті, оның моделі Астанада «ЭКСПО-2017» көрмесінде румыниялық павильонның орталық элементі ретінде ұсынылмақ.
