Арыста 600 га егін алқабы жаңбырлатып суғару әдісімен суғарылуда

Елімізде ауыл шаруашылығы саласына тамшылатып және жаңбырлатып суғару технологиясын енгізу бағытында ауқымды жұмыстар атқарылуда.  Бұл  әдіс арқылы шаруалар  ағын суды үнемдеп қана қоймай, өнім көлемін де арттыруда.

ОҚО-ның Арыс қаласындағы «Жаңа Ақдала» Агрофирмасы» ЖШС 600 гектар егін алқабына жаңбырлатып суғару технологиясын орнатты. Ақдала ауылдық округінде орналасқан серіктестік биыл өзіне қарасты егістік жерлерді игеру үшін Германияның BOUER компаниясынан шыққан жаңбырлатып суғару әдісін қолданып отыр.   Оның әрқайсысы бір орында 60 гектар жерді суғаруға мүмкіндігі бар. 

Айта кетерлік жайт, Шаруашылық құны 67 мың еуро тұратын құрылғының 7 данасын алып, іске қосқан. Мұндағы мамандар жаңбырлатып суару әдісінің тиімділігі көп дейді. 

«Біріншіден  үлкен жерлерді суғаруға тиімді, екіншіден  су үнемделіп, жұмыс күші көп қажет етілмейді. Үшіншіден бір мезгілде суғарылып, тегіс мол өнім алуға мүмкіндік туады екен», - деді олар.

Бұдан басқа, аталған шаруа қожалық биыл 400 гектар жерге қызанақ егіп, одан шыққан өнімді қуаттылығы 600 тонна болатын зауытта өңдеуді жоспарлап отыр. Мәселен, өткен жылы 300 гектар жерге егілген қызанақтан 1 мың тонна томат пастасы шығарылса, 120 гектар жерге отырғызылған алма бақтан да мол өнім алып, алма езбесін шығарған. Ал, осы жылы 3-4 мың тонна томат пастасы мен 200 тонна алма езбесін өндіру жоспарлануда. Оңтүстіктен шыққан томат пастасы мен алма тосабына бүгінде алыс-жақын шет елдерден сұраныстар көптеп түсуде.