ҚР Ұлттық музейінде Жеңіс күніне орай көрме ашылды (ФОТОРЕПОРТАЖ)

4 Мамыр, 2017 20:39

Қазақстан Республикасы Ұлттық музейінде «Ұлы Отан соғысының ардагерлері Х.Доспанова, М.Мәметова, Т.Бигелдинов, Ә.Нұршайықовтардың туғанына 95 жыл» деген атпен кітаптар көрмесі ашылды. Сонымен қатар, Жеңістің 72 жылдығына арналған әскери-тарихи минидиарама және «Ұлы Отан соғысындағы Қазақстандықтар» тақырыбымен әскери-тарихи тақырыптық көрме ашылды.

«Адамзат тарихындағы ең сұрапыл соғыстың аяқталғанына да 72 жыл өтті. Бірақ, Ұлы Жеңісімізді ұмытпайтымыз секілді, соғыс салған қасірет те, сол соғысқа қатысқан жауынгерлер де ешқашан ұмытылмақ емес және олардың ерлігі бүгінгі жауынгерлердің жүрегіне жігер құяры сөзсіз. Бұл күн, Жеңіс күні – алдағы талай ұрпақтың мерекесі болып қала береді. Бүгінгі музейдегі бұл шара елімізде тойланатын үлкен мерекенің бастамасы ғана», - деді ҚР Ұлттық музейі директорының орынбасары Леонид Кочетов.

Шара барысында ҚР Ұлттық музей қорынан алынған Ұлы Отан соғысы тақырыбындағы жәдігерлер, жеке заттар мен фотоқұжаттар көрсетілді.

ҚР Ұлттық музейі «Қазақстан тарихы» бөлімінің қызметкері Серік Әбдірахманов жасаған әскери-тарихи миниатюраларының диорамалары халық назарына ұсынылды.