Сенатта ХҚҚДБ-дан 80 млн долл қарыз алу туралы келісім талқыланды

2 Мамыр, 2017 16:34

Қазақстан Республикасы Парламенті Сенатының әлеуметтік-мәдени даму және ғылым комитетінің кеңейтілген отырысында «Қазақстан Республикасы мен Халықаралық Қайта Құру және Даму Банкі арасындағы Қарыз туралы келісімді (Әлеуметтік медициналық сақтандыру жобасы) ратификациялау туралы» Қазақстан Республикасы Заңының жобасы қаралды.

Сенаттың хабарлауынша, бұл Келісім 2016 жылғы 1 қарашада Астанада жасалған.

Келісімге сәйкес Халықаралық Қайта Құру және Даму Банкі Қазақстан Республикасына Әлеуметтік медициналық сақтандыру жобасын қаржыландыруға 5 жылдық жеңілдікті кезеңді қоса алғанда, 15 жыл өтеу мерзімімен 80 млн. АҚШ доллары сомасында қарыз береді.

Айта кетерлік жайт, комитет мүшелері қарыздың санаты, жобаның құрылымы, Келісімнің күшіне ену мерзімі, Жобаны қаржылық басқару, қаржылық есептер және Жоба бойынша өткізілетін аудиттерге қатысты мәселелерді көтерді. Сонымен бірге, Комитет мүшелері денсаулық сақтау саласындағы уәкілетті органның дәрілік заттарға шекті бағаны көтерме, сондай-ақ бөлшек нарықтарда орнату жөніндегі мәселелерді талқылады.

Тұтас алғанда қарыз есебінен емес, Қазақстан Республикасы мемлекеттік бюджеті қаражатының есебінен білім беру халықаралық технологияларының трансфертін, біліктілікті арттыруды, талапкерлерді әлемнің жетекші академиялық орталықтарында оқытуды және халықаралық сарапшылар мен консультанттарды тартуды қаржыландыру мәселелері көтерілді.

Бұдан басқа, депутаттармен тегін медициналық көмектің кепілдік берілген көлемі жүйесіндегі алдағы өзгерістер және әлеуметтік медициналық сақтандыру жобасынан күтілетін нәтижелер нақтыланды.

Заң жобасы Палатаның қарауына берілді.

Барлық жаңалықтар