Кішкентай қазақстандықтар еліміздің бірлік күнін атап өтуде (ВИДЕО)
1 Мамыр, 2017 10:26
1 мамыр – Қазақстан халықының бірлігі күні қарсаңында елордалық №30 Қайнар балабақшасының бүлдіршіндері мерекелік кеш өткізді. Салтанатты шара барысында олар барша қазақстандықтарды мың бұралған биімен және өлең шумақтарымен мерейлі мерекесімен құттықтады. Ал, өскелең ұрпаққа толеранттылық пен бірлік туралы қалай түсіндірілетіні жайлы сәбилер балабақшасының тәрбиешісі Алмагүл Балтабаева «Strategy2050.kz» АА берген эксклюзивті сұхбатында кеңінен айтып берді.
«Біз осы мейрамға дайындалдық, балалар қазақ, орыс тілдерінде тақпақтарын айтып, би биледі. Біз өзге ұлт өкілдеріне деген толеранттылық қарым-қатынасты бүлдіршіннің бойына ерте бастан сіңіруге тырысамыз», - деді сөз басында А. Балтабаева.
Сонымен қатар ол атап өткендей, «Қайнар» балабақшасында түрлі ұлт өкілдерінің балалары көптеп тәрбиеленуде.
«Біздің балабақшамызда түрлі ұлттар өте көп, бізде ұйғырлар, татарлар, кәрістер, тіпті поляктар да бар. Мен барша халқымызды мерейлі мерекемен құттықтаймын, оларға зор денсаулық, бейбітшілік және біздің Қазақстан жеріне құт-береке тілеймін», - деп ақ тілегін білдірді тәрбиеші.
Қайрат Жандыбаев
Видео Арман Мұхатов
