Г.Әбдіхалықова «Ла Скала» театрының бас директорымен кездесті

Кездесудің басында Мемлекеттік хатшы Қазақстан терең әрі жүйелі жаңарулар кезеңін бастан өткеріп жатқанын атап өтті. Мемлекет басшысы мықты әрі жауапкершілігі жоғары ұлт болу үшін болашаққа қалай қадам басып, бұқаралық сананы қалай өзгерту керектігі жөнінде міндет қойды. Мұны орындау үшін қажетті басты шарт төл мәдениетті, дербес ұлттық кодты сақтау болып саналады.

Г.Әбдіқалықова Қазақстан Президентінің тапсырмасы бойынша «Жаһандағы заманауи қазақстандық мәдениет» атты жобаның іске асырылатынын айтты. Мемлекеттік хатшы Елбасымыз бізді әлемнің қара алтынмен және сыртқы саясаттағы жобаларымызбен ғана емес, маңызды мәдени жетістіктерімізбен де тануға тиістігі жөнінде міндет қойғанына назар аударды.

Сондай-ақ, кездесуде опера және балет өнері саласындағы ынтымақтастықты дамыту, «Ла Скала» театрының Қазақстандағы және «Астана Опера» мемлекеттік опера және балет театрының Италиядағы гастрольдерін өткізу тәжірибесін өрістету мәселелері талқыланды.

Гүлшара Әбдіқалықова атап өткнедей, халықаралық «ЭКСПО-2017» мамандандырылған көрмесі аясында Қазақстан елордасында 1-10 қыркүйек аралығында тұңғыш рет Миландағы әйгілі «Ла Скала» театрының толық құрамдағы гастролі өткізіледі.

Мәдени бағдарлама аясында италиялық ұжым «Астана Опера» сахнасында Джузеппе Вердидің «Фальстаф» операсын ұсынады, сондай-ақ маэстро Зубин Метаның жетекшілігімен Людвиг ван Бетховеннің әйгілі шығармасы – №9 симфония орындалады.

Кездесу соңында Мемлекеттік хатшы Г.Әбдіқалықова А.Перейраға мықты денсаулық, мол игілік және зор  шығармашылық табыс тіледі.