Денсаулық сақтау министрлігі «Жоғары технологиялар күндері» республикалық акциясын бастады

17 Сәуір, 2017 17:19

Акция Солтүстік Қазақстан, Батыс Қазақстан, Шығыс Қазақстан, Қостанай, Ақтөбе, Атырау және Павлодар облыстарында өтеді, деп хабарлады Денсаулық сақтау министрлігінің баспасөз қызметі.

Аталған іс-шара аясында республикалық медициналық ұйымдардың жоғары білікті мамандарының қатысуымен шеберлік сыныптары, операциялар, консультациялар, дәрістер өткізу жоспарланған. Олар құрамында: кардиохирургтер, нейрохирургтер, травматологтар, хирургтер, онкологтар. Оның ішінде халықаралық деңгейдегі кардиохирург Юрий Пя, ҚР Денсаулық сақтау министрлігінің штаттан тыс бас хирургы Серік Ақшолақов, республиканың штаттан тыс бас травматолог-ортопеді Нұрлан Батпенов және басқалар.

Акция барысында қазақстандық дәрігерлер мен медицина қызметкерлері өздерінің білімін кеңейтуге, біліктілігін арттыруға, сұрақтар қоюға, қазақстандық медицина майталмандарымен және еліміздегі танымал басқа да дәрігерлермен пікір алысуға мүмкіндік алады.

«Жоғары технологиялар күндері» акциясының Қазақстанда міндетті әлеуметтік медициналық сақтандыруды енгізу аясында өткізілетіндігін атап өту керек. МӘМС-ті енгізу дәрігерлік көмекке мұқтаж адамдардың барлығына аталған қызметтің қолжетімділігін арттыруға мүмкіндік береді.

Акция ағымдағы жылдың 17 сәуірі мен 31 мамыры аралығында өтетінін естеріңізге саламыз.

Барлық жаңалықтар