Астанада ЭКСПО-2017 көрмесін өңірлерде ілгерілету мәселесі талқыланды
13 Сәуір, 2017 09:11
ЭКСПО-2017 ұйымдастырушысының кеңсесінде жергілікті атқарушы органдармен бірлесіп Халықаралық мамандандырылған Көрмені жылжыту жұмысы, өңірлерден келушілерді және шетелдік туристерді тарту, еріктілерді даярлау - осы және өзге де сұрақтар талқыланды, деп хабарлады Ұлттық компанияның баспасөз қызметі.
Кеңес қатысушылары Көрме нысандары, павильондардың контенті, билеттік бағдарлама және оның шарттары туралы егжей-тегжейлі таныстырылып, ЭКСПО-2017 көрмесінің мәдени-сауықтыру бағдарламасы ұсынылды.
Ұлттық компанияның жетекшісі "Астана ЭКСПО-2017" көрмесі Елбасының жобасы екендігін әрі жер-жерде әкімшілік ресурс арқылы келушілерді тарту орынсыздығын атап айтты.
"Сіздер (шенеуніктер) азаматтарға Көрменің мақсаты мен міндетін, оның болашақта Қазақстан экономикасына тигізетін мультипликациялық әсерін түсіндірулеріңіз қажет. ЭКСПО-2017 көрмесін сәтті өткізудің кепілі мәжбүрлеп міндеттеу емес, істі тиімді жылжыту және жарнамалау болып табылады", - деп көрсетті Ахметжан Есімов.
