Астаналық оқушылар «ақылды» жобаларын таныстырды (ФОТО)

12 Сәуір, 2017 19:57

Астана қаласының №60 мектебінде «робототехника» арнайы пәні информатика негізінде ашылды. Қазіргі таңда оқушылар робототехника факультативтік пәні кезінде өз жобаларын жасап, байқауларға қатысады. Бұл бағдарлама туралы №60 мектептің директоры Айман Дүйсенова баспасөз туры аясында айтып берді.

«Біздің мектеп жаратылыстану математика бағыты бойынша жұмыс істейді. Аталмыш бағыт топтамаларға бөлінеді. Оқушылар қызығушылықтарына орай химия, математика, физика және биология топтарына бөлінген. Информатика 5-сыныптан бастап бар. Оқытушылар аталмыш пән бойынша факультативтік сабақтар дайындайды»,- деді ол.

А.Дүйсенованың айтуынша, 5-сыныптан бастап ақпараттық технологияларды меңгертуге іріктеу жұмыстары жүргізіледі.

«Бізге ақпараттық технологиялар не береді? Біздің балалар мектеп бітірген соң ЖОО-ларға түседі. Олар республикалық деңгейдегі байқауларда жүлделі орынға ие болады. 2016-2017 жылдары біз аудандық байқауда 7 жүлделі орын, 2 қалалық және 1 республикалық деңгейде марапатталдық. Ақпараттық-технологиялық сынып әртүрлі байқауларға қатысып қана қоймай, «Цифрлық бум» атты халықаралық байқауға да қатысты, биыл олар 16 жүлделі орынға ие болды», - деді ол.

Өткен жылдың қыркүйегінен бастап робототехника пәні енгізілді. «Қадам» академиясымен бірігіп қолөнер курстары мен бағдарламалары әзірленуде.

«Мәселен, біздің оқушымызда «Қаладағы робототехника және қауіпсіздік» атты арнайы жоба бар. Ол жобаны республикалық олимпиадада таныстырып, 3-ші орын алды», - деді директоры.

Жалпы, пән шығармашылық әлеуетті арттырып, ғылыми-техникалық бағытты дамытады.

Ақбота Күзекбай

Фото:Бауыржан Жуасбаев