Сенат комитетінде мәдениет туралы заңнамаға түзетулер қаралды
Заң жобасы Парламент депутаттарының бастамашылығымен жасалды және Бюджет кодексіне, Әкімшілік құқық бұзушылық туралы кодекске, сондай-ақ «Тарихи-мәдени мұра объектілерін қорғау және пайдалану туралы», «Мәдениет туралы» және басқа да заңдарға түзетулер енгізуді көздейді.
Мәселен, жергілікті атқарушы органдардың еліміздің Бюджет кодексінде техникалық және кәсіптік, орта білімнен кейінгі білімі бар мамандарды ғана емес, жоғары және жоғары оқу орнынан кейінгі білімі бар мамандарды да даярлауға мемлекеттік білім беру тапсырысын бөлуге құқығын бекіту ұсынылады.
«Тарихи-мәдени мұра объектілерін қорғау және пайдалану туралы» заң музей-қорық сияқты жаңа ұғыммен толықтырылады, ол тарихи-мәдени мұра объектілерін және мәдени құндылықтарды сақтау, зерделеу және көпшілікке көрсету үшін құрылған.
«Мәдениет туралы» заңда Қазақстан халқының мәдени мұрасына жататын баспасөз басылымдарын сақтау мен көпшілікке таратуды жүзеге асыратын еліміздің Ұлттық мемлекеттік кітап палатасының мәртебесі белгіленеді; бұқаралық ақпарат құралдары редакциясының Ұлттық мемлекеттік кітап палатасына баспасөз басылымдарының міндетті тегін даналарын, ал электрондық нысанда – «Орталық» мәртебесі бар кітанханаларға ұсыну бойынша міндеттері бекітіледі.
Одан басқа, заң жобасымен мәдениет ұйымдары мен театрлардың қызметіне қатысты қоғамдық маңызы бар әдебиетті сатып алу, басып шығару және тарату мәселелерін реттеу, сондай-ақ мәдениет саласындағы уәкілетті органның құзыретін нақтылау ұсынылады.
Сенаторлар Ақан Бижанов, Әли Бектаев, Төлеубек Мұқашев, Нұрлан Қылышбаев, Серік Бектұрганов және Жабал Ерғалиев өз ескертпелері мен ұсыныстарын айтты. Заң жобасы Палатаның қарауына жіберілді.
