Теміртауда 275 орындық жаңа балабақша ашылды

19 Желтоқсан, 2013 15:12

Теміртауда Тәуелсіздік күні қарсаңында «Самал» жаңа балабақшасы ашылды. Кәмелеттік жасқа толмағандарды қайта бейімдеу орталығының бұрынғы ғимараты жөнделіп, мектепке дейінгі білім беретін мекемеге айналып отыр, деп хабарлайды «BNews.kz» агенттігі.

«Жаңа балабақша Қазақстан Республикасының тәуелсіздік тойына қарсы теміртаулықтарға арналған сый болды. Салтанатты ашылу шарасына қабылданатын балалар ата-аналарымен шақырылды», - делінген хабарламада.

«Біздің балабақшада 3-6 жас аралығындағы балалардың 11 тобы бар. Жаңа жылға дейін балақайлар бейімделу кезеңінен өткізіледі. Яғни, күніне 4 сағаттан болады. Мемлекеттік сатып алу шаралары жасалып жатқандықтан балабақшада тамақ берілмейді. Ал келер жылдың 1 қаңтарынан бастап тамақтандырылып, балалар таңертеңнен кешке дейін болады», - дейді «Самал» №21 балабақшасының жетекшісі Ирина Майчук.

Биыл бұрынғы бейімделу орталығының ғимаратына күрделі жөндеу өткізіп балабақшаға айналдыру үшін 33 млн теңге бөлінді. Бұл қаражатқа жаңа құрылғылар, тамақтандыру қондырғылары мен жиһаздар алынды. Балабақшада шамамен 70 адам қызмет етпек. Олардың 30-ы педагог. Балабақша жетекшілігінің мәліметінше, балабақша 2014 жылдан бастап толықтай күшімен қызмет етпек.

Барлық жаңалықтар