ШҚО-да мемлекеттік бағдарлама арқылы 1,5 мыңнан астам адам жұмыс тапты

7 Сәуір, 2017 17:58

2016 жылы Аягөз ауданында мемлекетік бағдарламалардың арқасында 1 686 тұрғын жұмысқа орналастырылды. Бұл туралы Аймақтық коммуникациялар қызметінде өткен баспасөз конференциясында аудан әкімі Бақытжан Байахметов хабарлады.

Аудан басшылығы жүргізетін саясаттың стратегиялық бағыттарының бірі халықты жұмыспен қамту. Осы ретте мемлекеттік бағдарламалар үлкен қолғабыс етеді. Мәселен, «Жұмыспен қамтудың жол картасы - 2020» бағдарламасы аясында 2016 жылы аягөздіктерге қажет 40 жоба жүзеге асырылды.

Бұдан басқа, жұмыссыздықты жою жолында ауыл шаруашылығы кооперативтерін құру едәуір пайдасын тигізуде. Олардың 12 ашылып, бүгінде 53 адам жұмысқа орналасты.

Б. Баяхметов атап өткендей, қосымша жұмыс орындары ауданда 2017-2021 жылдарға арналған агроөндірістік кешенді дамыту мемлекеттік бағдарламасы аясында пайда болады. Аймақта 19 мал семірту алаңы, 10 мал бордақылау пункті, 5 сүт-тауар фермасы ашылады.

Ағымдағы жылы 2726 адамды жұмыспен қамту көзделген. Жыл басынан бері 311 адам жаңа жұмыс тапты.