• Басты
  • «Құнанбай» және «Жаңғақ тал» фильмдері Пекинде өтетін фестивальге қатысады

«Құнанбай» және «Жаңғақ тал» фильмдері Пекинде өтетін фестивальге қатысады

5 Сәуір, 2017 11:19
Ш.Айманов атындағы «Қазақфильм» АҚ жарыққа шығарған «Құнанбай» және «Жаңғақ тал» фильмдері Қытайдың астанасында биыл сәуірдің 19-ы мен 21-і аралығында өтетін Халықаралық Пекин кинофестивалінің (Beijing International Film Festival) «Панорама» бағдарламасында көрсетілетін болады.

«Фильм көптеген фестивальдерге қатысып, танылып жатқанына өте қуаныштымын. Картинаның желісі мейірімге толы, сондықтан да қытайлық көрермендердің көңілінен шығатынына сенімдімін», - деді «Жаңғақ тал» фильмінің режиссері Ерлан Нұрмағамбетов.

Естеріңізге сала кетсек, «Жаңғақ тал» фильмі Оңтүстік Кореядағы Пусан фестивалінде әлемдік премьерасын өткізіп, онда New Currents («Жаңа ағым») секциясы аясында бас жүлдені иемденген болатын. Сонымен қатар, аталмыш картина Везульдегі Азия кинолары 22-і Халықаралық кинофестивалінің негізгі байқауында көрсетіліп, екі бірдей жүлдеге – халықаралық қазылардың арнаулы жүлдесіне және кино сыншыларының арнаулы жүлдесіне ие болды.

«Осыдан бірнеше жыл бұрын марқұм Таласбек Әсемқұлов екеуіміз «Біржан сал» фильмімен Қытайға арнайы барып едік. Көрсетілімге 500-ге жуық халық қатысты, олардың арасында қазақтар да болды. Фильмді өте керемет қабылдады. Тарихтан сыр шертетін фильміміз қытайлық көрермендерге ұнайды деген ойдамын», - деді «Құнанбай» фильмінің режиссері Досхан Жолжақсынов.

Ұлы ойшыл Абайдың әкесі – Құнанбай Өскенбайұлының өмірі жайлы баяндайтын тарихи туынды еліміз бойынша прокатқа 2015 жылы шығып, көрерменнің көзайымына айналған болатын. Аталмыш фильм ҚР Президенті Н.Ә.Назарбаевтың және Мемлекет тарапынан да жоғары бағасын алды. Елбасы ҚР Тәуелсіздік күнін тойлау қарсаңында 2016 жылдың әдебиет пен өнер саласы бойынша Мемлекеттік сыйлықты фильмнің түсіру тобына үлестірді. Жарлыққа сәйкес премия режиссер – Досхан Жолжақсыновқа,  қоюшы суретші – Рустам Одинаевқа, сонымен қатар актерлер – Нурсифат Салықоваға және Айдос Бектемірге берілді.

Сонымен қатар, алғашқы ұлттық «Тұлпар» кинопремиясында фильмнің авторлары үздік атанып, «Үздік ер адам рөлі», «Үздік қоюшы суретші», «Үздік композитор», «Үздік сценарий» аталымдар бойынша төрт бірдей жүлдеге қол жеткізді.  Одан бөлек, Уфада өткен III халықаралық ұлттық және этникалық кино «Күміс Ақбозат»  фестивалінде  Әмір Әбдіразақов атындағы «Ұлттық рух» жүлдесін иеленген.  

Пекин халықаралық кинофестивалі Қытайдың байланыс, радио, кинематография және телеарналар бас басқармасы және Пекиннің муниципалитет халық үкіметі, сондай-ақ Қытайдың кино жөніндегі басқармасының ұйымдастыруымен өткізіледі. Байқау ұйымдастырушыларының айтуына қарағанда, Пекин фестивалі жылдан жылға дамып, бүгінде Азияда өтіп жатқан кинофестивальдердің алдында тұр.  

Биыл байқауға 90 елден 1000-ға жуық кинотуындылар қатысып отыр. Олардың ішінен негізгі бағдарламаға 15 фильм іріктеліп алынған.

 Айта кетейік, Ш. Айманов атындағы «Қазақфильм» АҚ – Көркем, деректі, анимациялық кино өндірісі мен өндірістен кейінгі кезеңде тұрған өнімдермен (оның ішінде монтаждау, дыбыстау, т.б.) айналысатын Қазақстандағы негізгі кинокомпания. Ш.Айманов атындағы «Қазақфильм» киностудиясының тарихы 1934 жылдан бастау алады. 1960 жылы «Қазақфильм» атауына ие болды. 1984 жылы киностудияға ұлттық кинематогрфияның көрнекті қайраткері Шәкен Аймановтың есімі берілді.  

Барлық жаңалықтар