Қазақстанда 7 сәуір Ерлік күні атап өтіледі
3 Сәуір, 2017 18:36
ҚР Ұлттық Ұланында 7 сәуір Ерлік күні деп бекітілген. Бұл туралы апта сайынғы брифингте ҚР Орталық коммуникациялар қызметінің ресми өкілі Мұрат Жұманбай хабарлады.
«1995 жылы Тәжік-Ауған шекарасында ерлікпен қаза тапқан ҚР Ішкі әскерінің 17 жауынгерін еске алу мақсатында ҚР Ұлттық Ұланы 7 сәуір күнін Ерлік күні деп жариялаған болатын. Осы күні ҚР Ұлттық Ұланының бөлімшелері орналасқан аймақтарда ардагерлер, әскери міндетін өтеушілер Отан алдында борышын орындау барысында қаза тапқан жауынгерлерге құрмет көрсетеді», - деді М.Жұманбай.
Ресми өкілдің айтуынша, Астанада Отан қорғаушылар монументінде Ішкі істер министрлігі басшылығының және ҚР Ұлттық Ұланының басшылығының қатысуымен салтанатты шара өтетін болады.
