ЭКСПО-2017-де бірегей этноауыл бой көтереді

« «Қазанат» Ипподромы алаңында этноауыл өткізуді ұсындық. Этноауыл аймағы  2500 шаршы метрді құрап отыр. Ипподромда әртүрлі шаралар өтеді. Атап айтсақ,  дәстүрлі  спорттық ойындар: көкпар, бәйге, қыз қуу және т.с.с. Біз алдымен  11-13 маусым аралығында  Президент кубогына бәйге  өткіземіз», - деді Мәдениет және спорт министрі.

Этноауылда қолөнершілердің көрмесі өтеді, шара аясында концерттік алаң ұйымдастырылады. Қазіргі таңда министрлік  бірегей  «Spirit of Tengri»  жобасымен келісімге қол қойды. Аталмыш концерт  10-маусым басталады.

«Шарада  бүркіт пен құмай тазыларды қатыстырумен  дәстүрлі көріністер қойылады. Ұлттық ойын-сауық секторы да жұмыс істейді, көкпар, алтыбақан, күміс салу және өзге ойындар ұйымдастырылады. Этноауыл аясында біз жамбы ату, садақпен ату, аударыспақ  ұлттық ойындарын өткіземіз», - деді ол.

Министрдің айтуынша, бұл ауқымды әрі бірегей этноауыл болмақ.

Ақбота Күзекбай