Қостанай облысында инновациялық технологиялардың қолданылуымен 2013 жылы егістіктің 93%-ына астық себілді – Н.Садуақасов

«Бүгінгі таңда облыстың ЖІӨ көлемінің ішінде агроөнеркәсіптік кешеннің үлесі 14% құрайды. Біз республика бойынша ұн мен бидайдың 25%, еттің 10, сүттің 7%, жұмыртқаның 12%-ын өндіреміз. 5,2 млн га егістік алқаптың 4,4 млн гектары астық шаруашылығына арналған. Биыл инновациялық технологиялардың қолданылуымен барлық егістіктің 93%-ына астық себілді», - деді облыс әкімі.

Оның айтуынша, ұн мен бидай өндірісі, экспорты бойынша облыс республикадағы көшбасшы өңір.

«Биылғы жылы жаңа егістік кешендермен алқаптың 54 пайызы қамтылды. Ал жоғарғы өндірістік комбайндармен егістіктің 72%-ы жиналды. Бұл көрсеткіш 2004 жылы 208 млрд теңгеге 12 мың техниканы сатып алғанның арқасында келіп отыр. Мал басының өсуімен де ондағы шаруашылықтар жаңғыртылып, заманауи технологиялар енгізілді. Әсіресе бұл соңғы үш жылдағы нәтижелерден көрінеді», - деді әкім.

Өңір басшысының айтуынша, май өңдеу кәсіпкерлігі тек қана жергілікті шикізатпен жұмыс істейді. Және ол өз кезегінде өсімдік майының импортын 11 пайызға дейін түсіріп отыр.