Тәуелсіздік күні Алматы облысында үш балабақша ашылды

« Оның екеуі Талғар қаласында ашылды. «Айгөлек» балабақшасының құрылысы 2012 жылы басталған. Ол үшін республикалық бюджеттен 656 млн теңге бөлінді. Балабақша 150 адамдық, 3 жастан бастап балаларды қабылдайды», - делінген хабарламада.

Сол күні Талғарда 230 орындық тағы бір балабақша ашылды. Ол қайта жөндеуден өтіп қолданысқа берілді, мекеме 90 балаға шақталған. Ескі мекеменің жөндеу жұмысына республикалық бюджеттен 334 млн теңге бөлінді.

Жалпы ауданда 6 мемлекеттік, 18 жеке меншік балабақша мен 41 шағын орталық жұмыс істейді. Мектепке дейінгі мекемелер 51 пайызды құрады.

Көксу ауданы Мұқры ауылында кешенді жөндеуден кейін «Қызғалдақ» балабақшасы есігін айқара ашты. Ол 110 адамға шақталған. Бұл мекеменің іргетасы 35 жыл бұрын қаланған болатын. Ағымдағы жылы облыс әкімінің қолдауымен 120 млн теңгеге кешенді жөндеу жүріп балабақша халық игілігіне ұсынылды.