Астанада «Шашу» халықаралық өнер фестивалі басталды (ФОТОРЕПОРТАЖ)

Фестивальға қатысушылар «вокал» (эстрадалық, халық, академиялық), «хореография» (халық биі, халықтық-стильдік би, заманауи және эстрадалық би, балалар хореографиясы), «аспаптық жанр» (соло, ансамбль және оркестрлер), «халық әні» (халық әндерін өз сүйемелдеуімен орындау) сияқты төрт жанрда өз өнерлерін көрсетпек. 

Бүгін осы үлкен байқаудың бірінші күні өтті және көрермендер мен қазылар алқасының назарына «хореография» жанры бойынша қатысушылар, әр түрлі өңірлерден келген 35 би үйірмесі өз өнерлерін көрсетті.

Қазылар алқасы  қимыл техникасын ғана емес, сонымен қатар қатысушылардың жалпы әлеуетін бағалады. Қазылар алқасының құрамында белгілі өнер қайраткерлері, Қазақстанның құрметті мәдениет қызметкерлері және отандық эстрада жұлдыздары болды.

Ұйымдастырушылар хабарлағандай, байқаудың мақсаты - әр түрлі елдерден келген балалар мен жастар арасындағы достық және мәдени қарым-қатынастарды нығайту, көркемөнер шығармашылығын қолдау және дамыту, шығармашылық ұжымдар арасында тәжірибе мен жетістіктер алмасу, мерекелік атмосфера жасау, қатысушыларды Қазақстанның мәдени байлығымен таныстыру.

Фестиваль 29 наурызға дейін созылады. Байқау соңында Гала-концерт және жоба жеңімпаздарын марапаттау рәсімі өтетін болады. Гран-при кубогын жеңіп алған қатысушылар бастапқы жарнасыз қатысу құқығына ие болады. 

Ақбота Күзекбай

Фото Арман Мұхатов