Қазақстан мен Қытай ШҚО арқылы халықаралық магистральді дамытуды жоспарлауда
24 Наурыз, 2017 16:27
ҚХР СУАР-да қазақстандық делегация ШҚО әкімі Даниал Ахметовтың төрағалығымен қытайлық тараппен Қарамай-Тачен-Аягөз транзиттік темір жол құрылысы бойынша қытайлық тараппен келіссөздер өткізді.
Жоба өңірлік-географиялық басымдылыққа ие, даму үшін үлкен әлеуеті бар. Халықаралық магистраль Қытайдың солтүстік-шығысын. Қазақстан, Ресей және Еуропаны жалғайды. Магистральға қазақстандық тараптың қосылуы үшін ұзындығы 270 шақырым Бақты-Аягөз темір жолын салу қажет.
ШҚО ақпараттық орталығы хабарлағандай, кездесу қорытындылары бойынша тараптар Бақты-Аягөз және Қарамай-Тачен-Аягөз учаскесінің құрылысын алдын ала зерттеу бойынша меморандумға қол қойды.
«Аталмыш жобаны жүзеге асыру жаңа перспективаны ұсынады. Бұл жүк тасымалдаудың уақытын қысқартады», - деді ШҚО әкімі Даниал Ахметов.
Қытайлық тараптың болжамы бойынша, жобаны жүзеге асыруда жүк тасылымы 2020 жылға қарай 1,85 млн тоннаны, 2030-ға қарай 3 млн тоннаны құрауы керек.
