Мемлекет басшысы бірқатар тағайындаулар жасады

Мемлекет басшысының Өкімімен Дархан Қамзабекұлы Мыңбай Қазақстан халқы Ассамблеясы Төрағасының орынбасары, Қазақстан Республикасы Президенті Әкімшілігінің Қазақстан халқы Ассамблеясы хатшылығының меңгерушісі қызметіне тағайындалды, ол Қазақстан Республикасының Ұлттық мұражайының директоры қызметінен босатылды.

Мемлекет басшысының Өкімдерімен басқа жұмысқа ауысуларына байланысты:

Ералы Лұқпанұлы Тоғжанов Қазақстан халқы Ассамблеясы Төрағасының орынбасары, Қазақстан Республикасы Президенті Әкімшілігінің Қазақстан халқы Ассамблеясы хатшылығының меңгерушісі қызметінен;

Мәлік Кеңесбайұлы Мырзалин Қазақстан Республикасы Президенті Іс басқарушысының бірінші орынбасары қызметінен босатылды.

Сондай-ақ, Мемлекет басшысының Жарлықтарымен:

Алик Серікұлы Айдарбаев басқа жұмысқа ауысуына байланысты Маңғыстау облысының әкімі қызметінен;

Ерік Хамзаұлы Сұлтанов басқа жұмысқа ауысуына байланысты Солтүстік Қазақстан облысының әкімі қызметінен;

Сергей Витальевич Кулагин Ақмола облысының әкімі қызметінен босатылды.