Қарағанды облысында жедел жәрдемнің бірыңғай диспетчерлік қызметі құрылады

13 Наурыз, 2017 17:21

Қарағанды облысында жедел жәрдемнің бірыңғай диспетчерлік қызметі жобасы қолға алынды. Бұл туралы аймақ басшысы Нұрмұхамбет Әбдібековтың медициналық мекемелердің басшыларымен кездесуінде облыстық денсаулық сақтау басқармасының басшысы Ержан Нұрлыбаев мәлім етті.

Ведомство басшысы электронды денсаулық сақтауды дамытудың қадамдарына тоқталды.

«2017 жылдың қаңтарынан бастап облыстық ауруханаларда «Стационар» денсаулық сақтаудың кешенді медициналық ақпараттық жүйесінің жаңа модулі енгізілуде. Жоба желтоқсанға қарай аяқталады. Осылайша, барлық медициналық ұйымдар бірыңғай ақпараттық алаңда жұмыс істейді, бұл электронды денсаулық сақтау төлқұжатын сәтті енгізу мен міндетті әлеуметтік медициналық сақтандыру жағдайында жұмыс істеуге көшу үшін негіз болады. Келесі қадам жедел жәрдемнің бірыңғай диспетчерлік қызметін құру болады», - деді баяндамашы.

Барлық шақырулар бірыңғай ақпараттық жүйеге енгізіледі. Жедел жәрдем машиналары GPS-навигаторлармен жабдықталады. Бюджеттен 36 реаномобиль сатып алуға 1,2 млрд. теңге бөлінеді.

Қарағандыда жедел жәрдемнің жаңа үш шағын станциясын салу туралы шешім қабылданды, деп хабарлады Ержан Нұрлыбаев. 2017 жылы жобалау-сметалық құжаттама әзірлеуге қаржы бөлінді. Құрылысты 2018 жылы бастау көзделген.

«Екі шағын станция – Майқұдық ауданында, біреуі – Сұрыптауда орналасады. Аталған жобаны жүзеге асыру шұғыл көмекті жақсартуға мүмкіндік береді», - деп атап өтті облыстық денсаулық сақтау басқармасының басшысы.

Барлық жаңалықтар